Vayak'hel (Hebrew)

Shemot 35:1 - 38:20
Shemot 35:1 ויקהל משׁה את־כל־עדת בני ישׂראל ויאמר אלהם אלה הדברים אשׁר־צוה יהוה לעשׂת אתם׃
Shemot 35:2 שׁשׁת ימים תעשׂה מלאכה וביום השׁביעי יהיה לכם קדשׁ שׁבת שׁבתון ליהוה כל־העשׂה בו מלאכה יומת׃
Shemot 35:3 לא־תבערו אשׁ בכל משׁבתיכם ביום השׁבת׃
Shemot 35:4 ויאמר משׁה אל־כל־עדת בני־ישׂראל לאמר זה הדבר אשׁר־צוה יהוה לאמר׃
Shemot 35:5 קחו מאתכם תרומה ליהוה כל נדיב לבו יביאה את תרומת יהוה זהב וכסף ונחשׁת׃
Shemot 35:6 ותכלת וארגמן ותולעת שׁני ושׁשׁ ועזים׃
Shemot 35:7 וערת אילם מאדמים וערת תחשׁים ועצי שׂטים׃
Shemot 35:8 ושׁמן למאור ובשׂמים לשׁמן המשׁחה ולקטרת הסמים׃
Shemot 35:9 ואבני־שׁהם ואבני מלאים לאפוד ולחשׁן׃
Shemot 35:10 וכל־חכם־לב בכם יבאו ויעשׂו את כל־אשׁר צוה יהוה׃
Shemot 35:11 את־המשׁכן את־אהלו ואת־מכסהו את־קרסיו ואת־קרשׁיו את־בריחו את־עמדיו ואת־אדניו׃
Shemot 35:12 את־הארן ואת־בדיו את־הכפרת ואת פרכת המסך׃
Shemot 35:13 את־השׁלחן ואת־בדיו ואת־כל־כליו ואת לחם הפנים׃
Shemot 35:14 ואת־מנרת המאור ואת־כליה ואת־נרתיה ואת שׁמן המאור׃
Shemot 35:15 ואת־מזבח הקטרת ואת־בדיו ואת שׁמן המשׁחה ואת קטרת הסמים ואת־מסך הפתח לפתח המשׁכן׃
Shemot 35:16 את מזבח העלה ואת־מכבר הנחשׁת אשׁר־לו את־בדיו ואת־כל־כליו את־הכיר ואת־כנו׃
Shemot 35:17 את קלעי החצר את־עמדיו ואת־אדניה ואת מסך שׁער החצר׃
Shemot 35:18 את־יתדת המשׁכן ואת־יתדת החצר ואת־מיתריהם׃
Shemot 35:19 את־בגדי השׂרד לשׁרת בקדשׁ את־בגדי הקדשׁ לאהרן הכהן ואת־בגדי בניו לכהן׃
Shemot 35:20 ויצאו כל־עדת בני־ישׂראל מלפני משׁה׃
Shemot 35:21 ויבאו כל־אישׁ אשׁר־נשׂאו לבו וכל אשׁר נדבה רוחו אתו הביאו את־תרומת יהוה למלאכת אהל מועד ולכל־עבדתו ולבגדי הקדשׁ׃
Shemot 35:22 ויבאו האנשׁים על־הנשׁים כל נדיב לב הביאו חח ונזם וטבעת וכומז כל־כלי זהב וכל־אישׁ אשׁר הניף תנופת זהב ליהוה׃
Shemot 35:23 וכל־אישׁ אשׁר־נמצא אתו תכלת וארגמן ותולעת שׁני ושׁשׁ ועזים וערת אילם מאדמים וערת תחשׁים הביאו׃
Shemot 35:24 כל־מרים תרומת כסף ונחשׁת הביאו את תרומת יהוה וכל אשׁר נמצא אתו עצי שׁטים לכל־מלאכת העבדה הביאו׃
Shemot 35:25 וכל־אשׁה חכמת־לב בידיה טוו ויביאו מטוה את־התכלת ואת־הארגמן את־תולעת השׁני ואת־השׁשׁ׃
Shemot 35:26 וכל־הנשׁים אשׁר נשׂא לבן אתנה בחכמה טוו את־העזים׃
Shemot 35:27 והנשׂאם הביאו את אבני השׁהם ואת אבני המלאים לאפוד ולחשׁן׃
Shemot 35:28 ואת־הבשׂם ואת־השׁמן למאור ולשׁמן המשׁחה ולקטרת הסמים׃
Shemot 35:29 כל־אישׁ ואשׁה אשׁר נדב לבם אתם להביא לכל־המלאכה אשׁר צוה יהוה לעשׂות ביד־משׁה הביאו בני־ישׂראל נדבה ליהוה׃
Shemot 35:30 ויאמר משׁה אל־בני ישׂראל ראו קרא יהוה בשׁם בצלאל בן־אורי בן־חור למטה יהודה׃
Shemot 35:31 וימלא אתו רוח אלהים בחכמה בתבונה ובדעת ובכל־מלאכה׃
Shemot 35:32 ולחשׁב מחשׁבת לעשׂת בזהב ובכסף ובנחשׁת׃
Shemot 35:33 ובחרשׁת אבן למלאת ובחרשׁת עץ לעשׂות בכל־מלאכת מחשׁבת׃
Shemot 35:34 ולהורת נתן בלבו הוא ואהליאב בן־אחיסמך למטה־דן׃
Shemot 35:35 מלא אתם חכמת־לב לעשׂות כל־מלאכת חרשׁ וחשׁב ורקם בתכלת ובארגמן בתולעת השׁני ובשׁשׁ וארג עשׂי כל־מלאכה וחשׁבי מחשׁבת׃
Shemot 36:1 ועשׂה בצלאל ואהליאב וכל אישׁ חכם־לב אשׁר נתן יהוה חכמה ותבונה בהמה לדעת לעשׂת את־כל־מלאכת עבדת הקדשׁ לכל אשׁר־צוה יהוה׃
Shemot 36:2 ויקרא משׁה אל־בצלאל ואל־אהליאב ואל כל־אישׁ חכם־לב אשׁר נתן יהוה חכמה בלבו כל אשׁר נשׂאו לבו לקרבה אל־המלאכה לעשׂת אתה׃
Shemot 36:3 ויקחו מלפני משׁה את כל־התרומה אשׁר הביאו בני ישׂראל למלאכת עבדת הקדשׁ לעשׂת אתה והם הביאו אליו עוד נדבה בבקר בבקר׃
Shemot 36:4 ויבאו כל־החכמים העשׂים את כל־מלאכת הקדשׁ אישׁ־אישׁ ממלאכתו אשׁר־המה עשׂים׃
Shemot 36:5 ויאמרו אל־משׁה לאמר מרבים העם להביא מדי העבדה למלאכה אשׁר־צוה יהוה לעשׂת אתה׃
Shemot 36:6 ויצו משׁה ויעבירו קול במחנה לאמר אישׁ ואשׁה אל־יעשׂו־עוד מלאכה לתרומת הקדשׁ ויכלא העם מהביא׃
Shemot 36:7 והמלאכה היתה דים לכל־המלאכה לעשׂות אתה והותר׃
Shemot 36:8 ויעשׂו כל־חכם־לב בעשׂי המלאכה את־המשׁכן עשׂר יריעת שׁשׁ משׁזר ותכלת וארגמן ותולעת שׁני כרבים מעשׂה חשׁב עשׂה אתם׃
Shemot 36:9 ארך היריעה האחת שׁמנה ועשׂרים באמה ורחב ארבע באמה היריעה האחת מדה אחת לכל־היריעת׃
Shemot 36:10 ויחבר את־חמשׁ היריעת אחת אל־אחת וחמשׁ יריעת חבר אחת אל־אחת׃
Shemot 36:11 ויעשׂ ללאת תכלת על שׂפת היריעה האחת מקצה במחברת כן עשׂה בשׂפת היריעה הקיצונה במחברת השׁנית׃
Shemot 36:12 חמשׁים ללאת עשׂה ביריעה האחת וחמשׁים ללאת עשׂה בקצה היריעה אשׁר במחברת השׁנית מקבילת הללאת אחת אל־אחת׃
Shemot 36:13 ויעשׂ חמשׁים קרסי זהב ויחבר את־היריעת אחת אל־אחת בקרסים ויהי המשׁכן אחד׃
Shemot 36:14 ויעשׂ יריעת עזים לאהל על־המשׁכן עשׁתי־עשׂרה יריעת עשׂה אתם׃
Shemot 36:15 ארך היריעה האחת שׁלשׁים באמה וארבע אמות רחב היריעה האחת מדה אחת לעשׁתי עשׂרה יריעת׃
Shemot 36:16 ויחבר את־חמשׁ היריעת לבד ואת־שׁשׁ היריעת לבד׃
Shemot 36:17 ויעשׂ ללאת חמשׁים על שׂפת היריעה הקיצנה במחברת וחמשׁים ללאת עשׂה על־שׂפת היריעה החברת השׁנית׃
Shemot 36:18 ויעשׂ קרסי נחשׁת חמשׁים לחבר את־האהל להית אחד׃
Shemot 36:19 ויעשׂ מכסה לאהל ערת אילם מאדמים ומכסה ערת תחשׁים מלמעלה׃
Shemot 36:20 ויעשׂ את־הקרשׁים למשׁכן עצי שׁטים עמדים׃
Shemot 36:21 עשׂר אמת ארך הקרשׁ ואמה וחצי האמה רחב הקרשׁ האחד׃
Shemot 36:22 שׁתי ידת לקרשׁ האחד משׁלבת אחת אל־אחת כן עשׂה לכל קרשׁי המשׁכן׃
Shemot 36:23 ויעשׂ את־הקרשׁים למשׁכן עשׂרים קרשׁים לפאת נגב תימנה׃
Shemot 36:24 וארבעים אדני־כסף עשׂה תחת עשׂרים הקרשׁים שׁני אדנים תחת־הקרשׁ האחד לשׁתי ידתיו ושׁני אדנים תחת־הקרשׁ האחד לשׁתי ידתיו׃
Shemot 36:25 ולצלע המשׁכן השׁנית לפאת צפון עשׂה עשׂרים קרשׁים׃
Shemot 36:26 וארבעים אדניהם כסף שׁני אדנים תחת הקרשׁ האחד ושׁני אדנים תחת הקרשׁ האחד׃
Shemot 36:27 ולירכתי המשׁכן ימה עשׂה שׁשׁה קרשׁים׃
Shemot 36:28 ושׁני קרשׁים עשׂה למקצעת המשׁכן בירכתים׃
Shemot 36:29 והיו תואמם מלמטה ויחדו יהיו תמים אל־ראשׁו אל־הטבעת האחת כן עשׂה לשׁניהם לשׁני המקצעת׃
Shemot 36:30 והיו שׁמנה קרשׁים ואדניהם כסף שׁשׁה עשׂר אדנים שׁני אדנים שׁני אדנים תחת הקרשׁ האחד׃
Shemot 36:31 ויעשׂ בריחי עצי שׁטים חמשׁה לקרשׁי צלע־המשׁכן האחת׃
Shemot 36:32 וחמשׁה בריחם לקרשׁי צלע־המשׁכן השׁנית וחמשׁה בריחם לקרשׁי המשׁכן לירכתים ימה׃
Shemot 36:33 ויעשׂ את־הבריח התיכן לברח בתוך הקרשׁים מן־הקצה אל־הקצה׃
Shemot 36:34 ואת־הקרשׁים צפה זהב ואת־טבעתם עשׂה זהב בתים לבריחם ויצף את־הבריחם זהב׃
Shemot 36:35 ויעשׂ את־הפרכת תכלת וארגמן ותולעת שׁני ושׁשׁ משׁזר מעשׂה חשׁב עשׂה אתה כרבים׃
Shemot 36:36 ויעשׂ לה ארבעה עמודי שׁטים ויצפם זהב וויהם זהב ויצק להם ארבעה אדני־כסף׃
Shemot 36:37 ויעשׂ מסך לפתח האהל תכלת וארגמן ותולעת שׁני ושׁשׁ משׁזר מעשׂה רקם׃
Shemot 36:38 ואת־עמודיו חמשׁה ואת־וויהם וצפה ראשׁיהם וחשׁקיהם זהב ואדניהם חמשׁה נחשׁת׃
Shemot 37:1 ויעשׂ בצלאל את־הארן עצי שׁטים אמתים וחצי ארכו ואמה וחצי רחבו ואמה וחצי קמתו׃
Shemot 37:2 ויצפהו זהב טהור מבית ומחוץ ויעשׂ לו זר זהב סביב׃
Shemot 37:3 ויצק לו ארבע טבעת זהב על ארבע פעמתיו ושׁתי טבעת על־צלעו האחת ושׁתי טבעת על־צלעו השׁנית׃
Shemot 37:4 ויעשׂ בדי עצי שׁטים ויצף אתם זהב׃
Shemot 37:5 ויבא את־הבדים בטבעת על צלעת הארן לשׂאת את־הארן׃
Shemot 37:6 ויעשׂ כפרת זהב טהור אמתים וחצי ארכה ואמה וחצי רחבה׃
Shemot 37:7 ויעשׂ שׁני כרבים זהב מקשׁה עשׂה אתם משׁני קצות הכפרת׃
Shemot 37:8 כרוב־אחד מקצה מזה וכרוב־אחד מקצה מזה מן־הכפרת עשׂה את־הכרבים משׁני קצוותו׃
Shemot 37:9 ויהיו הכרבים פרשׂי כנפים למעלה סככים בכנפיהם על־הכפרת ופניהם אישׁ אל־אחיו אל־הכפרת היו פני הכרבים׃
Shemot 37:10 ויעשׂ את־השׁלחן עצי שׁטים אמתים ארכו ואמה רחבו ואמה וחצי קמתו׃
Shemot 37:11 ויצף אתו זהב טהור ויעשׂ לו זר זהב סביב׃
Shemot 37:12 ויעשׂ לו מסגרת טפח סביב ויעשׂ זר־זהב למסגרתו סביב׃
Shemot 37:13 ויצק לו ארבע טבעת זהב ויתן את־הטבעת על ארבע הפאת אשׁר לארבע רגליו׃
Shemot 37:14 לעמת המסגרת היו הטבעת בתים לבדים לשׂאת את־השׁלחן׃
Shemot 37:15 ויעשׂ את־הבדים עצי שׁטים ויצף אתם זהב לשׂאת את־השׁלחן׃
Shemot 37:16 ויעשׂ את־הכלים אשׁר על־השׁלחן את־קערתיו ואת־כפתיו ואת מנקיתיו ואת־הקשׂות אשׁר יסך בהן זהב טהור׃
Shemot 37:17 ויעשׂ את־המנרה זהב טהור מקשׁה עשׂה את־המנרה ירכה וקנה גביעיה כפתריה ופרחיה ממנה היו׃
Shemot 37:18 ושׁשׁה קנים יצאים מצדיה שׁלשׁה קני מנרה מצדה האחד ושׁלשׁה קני מנרה מצדה השׁני׃
Shemot 37:19 שׁלשׁה גבעים משׁקדים בקנה האחד כפתר ופרח ושׁלשׁה גבעים משׁקדים בקנה אחד כפתר ופרח כן לשׁשׁת הקנים היצאים מן־המנרה׃
Shemot 37:20 ובמנרה ארבעה גבעים משׁקדים כפתריה ופרחיה׃
Shemot 37:21 וכפתר תחת שׁני הקנים ממנה וכפתר תחת שׁני הקנים ממנה וכפתר תחת־שׁני הקנים ממנה לשׁשׁת הקנים היצאים ממנה׃
Shemot 37:22 כפתריהם וקנתם ממנה היו כלה מקשׁה אחת זהב טהור׃
Shemot 37:23 ויעשׂ את־נרתיה שׁבעה ומלקחיה ומחתתיה זהב טהור׃
Shemot 37:24 ככר זהב טהור עשׂה אתה ואת כל־כליה׃
Shemot 37:25 ויעשׂ את־מזבח הקטרת עצי שׁטים אמה ארכו ואמה רחבו רבוע ואמתים קמתו ממנו היו קרנתיו׃
Shemot 37:26 ויצף אתו זהב טהור את־גגו ואת־קירתיו סביב ואת־קרנתיו ויעשׂ לו זר זהב סביב׃
Shemot 37:27 ושׁתי טבעת זהב עשׂה־לו מתחת לזרו על שׁתי צלעתיו על שׁני צדיו לבתים לבדים לשׂאת אתו בהם׃
Shemot 37:28 ויעשׂ את־הבדים עצי שׁטים ויצף אתם זהב׃
Shemot 37:29 ויעשׂ את־שׁמן המשׁחה קדשׁ ואת־קטרת הסמים טהור מעשׂה רקח׃
Shemot 38:1 ויעשׂ את־מזבח העלה עצי שׁטים חמשׁ אמות ארכו וחמשׁ־אמות רחבו רבוע ושׁלשׁ אמות קמתו׃
Shemot 38:2 ויעשׂ קרנתיו על ארבע פנתיו ממנו היו קרנתיו ויצף אתו נחשׁת׃
Shemot 38:3 ויעשׂ את־כל־כלי המזבח את־הסירת ואת־היעים ואת־המזרקת את־המזלגת ואת־המחתת כל־כליו עשׂה נחשׁת׃
Shemot 38:4 ויעשׂ למזבח מכבר מעשׂה רשׁת נחשׁת תחת כרכבו מלמטה עד־חציו׃
Shemot 38:5 ויצק ארבע טבעת בארבע הקצות למכבר הנחשׁת בתים לבדים׃
Shemot 38:6 ויעשׂ את־הבדים עצי שׁטים ויצף אתם נחשׁת׃
Shemot 38:7 ויבא את־הבדים בטבעת על צלעת המזבח לשׂאת אתו בהם נבוב לחת עשׂה אתו׃
Shemot 38:8 ויעשׂ את הכיור נחשׁת ואת כנו נחשׁת במראת הצבאת אשׁר צבאו פתח אהל מועד׃
Shemot 38:9 ויעשׂ את־החצר לפאת נגב תימנה קלעי החצר שׁשׁ משׁזר מאה באמה׃
Shemot 38:10 עמודיהם עשׂרים ואדניהם עשׂרים נחשׁת ווי העמודים וחשׁקיהם כסף׃
Shemot 38:11 ולפאת צפון מאה באמה עמודיהם עשׂרים ואדניהם עשׂרים נחשׁת ווי העמודים וחשׁקיהם כסף׃
Shemot 38:12 ולפאת־ים קלעים חמשׁים באמה עמודיהם עשׂרה ואדניהם עשׂרה ווי העמדים וחשׁוקיהם כסף׃
Shemot 38:13 ולפאת קדמה מזרחה חמשׁים אמה׃
Shemot 38:14 קלעים חמשׁ־עשׂרה אמה אל־הכתף עמודיהם שׁלשׁה ואדניהם שׁלשׁה׃
Shemot 38:15 ולכתף השׁנית מזה ומזה לשׁער החצר קלעים חמשׁ עשׂרה אמה עמדיהם שׁלשׁה ואדניהם שׁלשׁה׃
Shemot 38:16 כל־קלעי החצר סביב שׁשׁ משׁזר׃
Shemot 38:17 והאדנים לעמדים נחשׁת ווי העמודים וחשׁוקיהם כסף וצפוי ראשׁיהם כסף והם מחשׁקים כסף כל עמדי החצר׃
Shemot 38:18 ומסך שׁער החצר מעשׂה רקם תכלת וארגמן ותולעת שׁני ושׁשׁ משׁזר ועשׂרים אמה ארך וקומה ברחב חמשׁ אמות לעמת קלעי החצר׃
Shemot 38:19 ועמדיהם ארבעה ואדניהם ארבעה נחשׁת וויהם כסף וצפוי ראשׁיהם וחשׁקיהם כסף׃
Shemot 38:20 וכל־היתדת למשׁכן ולחצר סביב נחשׁת׃