Pekudei (Hebrew)

Shemot 38:21-40:38
Shemot 38:21 אלה פקודי המשׁכן משׁכן העדת אשׁר פקד על־פי משׁה עבדת הלוים ביד איתמר בן־אהרן הכהן׃
Shemot 38:22 ובצלאל בן־אורי בן־חור למטה יהודה עשׂה את כל־אשׁר־צוה יהוה את־משׁה׃
Shemot 38:23 ואתו אהליאב בן־אחיסמך למטה־דן חרשׁ וחשׁב ורקם בתכלת ובארגמן ובתולעת השׁני ובשׁשׁ׃
Shemot 38:24 כל־הזהב העשׂוי למלאכה בכל מלאכת הקדשׁ ויהי זהב התנופה תשׁע ועשׂרים ככר ושׁבע מאות ושׁלשׁים שׁקל בשׁקל הקדשׁ׃
Shemot 38:25 וכסף פקודי העדה מאת ככר ואלף ושׁבע מאות וחמשׁה ושׁבעים שׁקל בשׁקל הקדשׁ׃
Shemot 38:26 בקע לגלגלת מחצית השׁקל בשׁקל הקדשׁ לכל העבר על־הפקדים מבן עשׂרים שׁנה ומעלה לשׁשׁ־מאות אלף ושׁלשׁת אלפים וחמשׁ מאות וחמשׁים׃
Shemot 38:27 ויהי מאת ככר הכסף לצקת את אדני הקדשׁ ואת אדני הפרכת מאת אדנים למאת הככר ככר לאדן׃
Shemot 38:28 ואת־האלף ושׁבע המאות וחמשׁה ושׁבעים עשׂה ווים לעמודים וצפה ראשׁיהם וחשׁק אתם׃
Shemot 38:29 ונחשׁת התנופה שׁבעים ככר ואלפים וארבע־מאות שׁקל׃
Shemot 38:30 ויעשׂ בה את־אדני פתח אהל מועד ואת מזבח הנחשׁת ואת־מכבר הנחשׁת אשׁר־לו ואת כל־כלי המזבח׃
Shemot 38:31 ואת־אדני החצר סביב ואת־אדני שׁער החצר ואת כל־יתדת המשׁכן ואת־כל־יתדת החצר סביב׃
Shemot 39:1 ומן־התכלת והארגמן ותולעת השׁני עשׂו בגדי־שׂרד לשׁרת בקדשׁ ויעשׂו את־בגדי הקדשׁ אשׁר לאהרן כאשׁר צוה יהוה את־משׁה׃
Shemot 39:2 ויעשׂ את־האפד זהב תכלת וארגמן ותולעת שׁני ושׁשׁ משׁזר׃
Shemot 39:3 וירקעו את־פחי הזהב וקצץ פתילם לעשׂות בתוך התכלת ובתוך הארגמן ובתוך תולעת השׁני ובתוך השׁשׁ מעשׂה חשׁב׃
Shemot 39:4 כתפת עשׂו־לו חברת על־שׁני קצוותו חבר׃
Shemot 39:5 וחשׁב אפדתו אשׁר עליו ממנו הוא כמעשׂהו זהב תכלת וארגמן ותולעת שׁני ושׁשׁ משׁזר כאשׁר צוה יהוה את־משׁה׃
Shemot 39:6 ויעשׂו את־אבני השׁהם מסבת משׁבצת זהב מפתחת פתוחי חותם על־שׁמות בני ישׂראל׃
Shemot 39:7 וישׂם אתם על כתפת האפד אבני זכרון לבני ישׂראל כאשׁר צוה יהוה את־משׁה׃
Shemot 39:8 ויעשׂ את־החשׁן מעשׂה חשׁב כמעשׂה אפד זהב תכלת וארגמן ותולעת שׁני ושׁשׁ משׁזר׃
Shemot 39:9 רבוע היה כפול עשׂו את־החשׁן זרת ארכו וזרת רחבו כפול׃
Shemot 39:10 וימלאו־בו ארבעה טורי אבן טור אדם פטדה וברקת הטור האחד׃
Shemot 39:11 והטור השׁני נפך ספיר ויהלם׃
Shemot 39:12 והטור השׁלישׁי לשׁם שׁבו ואחלמה׃
Shemot 39:13 והטור הרביעי תרשׁישׁ שׁהם וישׁפה מוסבת משׁבצת זהב במלאתם׃
Shemot 39:14 והאבנים על־שׁמת בני־ישׂראל הנה שׁתים עשׂרה על־שׁמתם פתוחי חתם אישׁ על־שׁמו לשׁנים עשׂר שׁבט׃
Shemot 39:15 ויעשׂו על־החשׁן שׁרשׁרת גבלת מעשׂה עבת זהב טהור׃
Shemot 39:16 ויעשׂו שׁתי משׁבצת זהב ושׁתי טבעת זהב ויתנו את־שׁתי הטבעת על־שׁני קצות החשׁן׃
Shemot 39:17 ויתנו שׁתי העבתת הזהב על־שׁתי הטבעת על־קצות החשׁן׃
Shemot 39:18 ואת שׁתי קצות שׁתי העבתת נתנו על־שׁתי המשׁבצת ויתנם על־כתפת האפד אל־מול פניו׃
Shemot 39:19 ויעשׂו שׁתי טבעת זהב וישׂימו על־שׁני קצות החשׁן על־שׂפתו אשׁר אל־עבר האפד ביתה׃
Shemot 39:20 ויעשׂו שׁתי טבעת זהב ויתנם על־שׁתי כתפת האפד מלמטה ממול פניו לעמת מחברתו ממעל לחשׁב האפד׃
Shemot 39:21 וירכסו את־החשׁן מטבעתיו אל־טבעת האפד בפתיל תכלת להית על־חשׁב האפד ולא־יזח החשׁן מעל האפד כאשׁר צוה יהוה את־משׁה׃
Shemot 39:22 ויעשׂ את־מעיל האפד מעשׂה ארג כליל תכלת׃
Shemot 39:23 ופי־המעיל בתוכו כפי תחרא שׂפה לפיו סביב לא יקרע׃
Shemot 39:24 ויעשׂו על־שׁולי המעיל רמוני תכלת וארגמן ותולעת שׁני משׁזר׃
Shemot 39:25 ויעשׂו פעמני זהב טהור ויתנו את־הפעמנים בתוך הרמנים על־שׁולי המעיל סביב בתוך הרמנים׃
Shemot 39:26 פעמן ורמן פעמן ורמן על־שׁולי המעיל סביב לשׁרת כאשׁר צוה יהוה את־משׁה׃
Shemot 39:27 ויעשׂו את־הכתנת שׁשׁ מעשׂה ארג לאהרן ולבניו׃
Shemot 39:28 ואת המצנפת שׁשׁ ואת־פארי המגבעת שׁשׁ ואת־מכנסי הבד שׁשׁ משׁזר׃
Shemot 39:29 ואת־האבנט שׁשׁ משׁזר ותכלת וארגמן ותולעת שׁני מעשׂה רקם כאשׁר צוה יהוה את־משׁה׃
Shemot 39:30 ויעשׂו את־ציץ נזר־הקדשׁ זהב טהור ויכתבו עליו מכתב פתוחי חותם קדשׁ ליהוה׃
Shemot 39:31 ויתנו עליו פתיל תכלת לתת על־המצנפת מלמעלה כאשׁר צוה יהוה את־משׁה׃
Shemot 39:32 ותכל כל־עבדת משׁכן אהל מועד ויעשׂו בני ישׂראל ככל אשׁר צוה יהוה את־משׁה כן עשׂו׃
Shemot 39:33 ויביאו את־המשׁכן אל־משׁה את־האהל ואת־כל־כליו קרסיו קרשׁיו בריחו ועמדיו ואדניו׃
Shemot 39:34 ואת־מכסה עורת האילם המאדמים ואת־מכסה ערת התחשׁים ואת פרכת המסך׃
Shemot 39:35 את־ארון העדת ואת־בדיו ואת הכפרת׃
Shemot 39:36 את־השׁלחן את־כל־כליו ואת לחם הפנים׃
Shemot 39:37 את־המנרה הטהרה את־נרתיה נרת המערכה ואת־כל־כליה ואת שׁמן המאור׃
Shemot 39:38 ואת מזבח הזהב ואת שׁמן המשׁחה ואת קטרת הסמים ואת מסך פתח האהל׃
Shemot 39:39 את מזבח הנחשׁת ואת־מכבר הנחשׁת אשׁר־לו את־בדיו ואת־כל־כליו את־הכיר ואת־כנו׃
Shemot 39:40 את קלעי החצר את־עמדיה ואת־אדניה ואת־המסך לשׁער החצר את־מיתריו ויתדתיה ואת כל־כלי עבדת המשׁכן לאהל מועד׃
Shemot 39:41 את־בגדי השׂרד לשׁרת בקדשׁ את־בגדי הקדשׁ לאהרן הכהן ואת־בגדי בניו לכהן׃
Shemot 39:42 ככל אשׁר־צוה יהוה את־משׁה כן עשׂו בני ישׂראל את כל־העבדה׃
Shemot 39:43 וירא משׁה את־כל־המלאכה והנה עשׂו אתה כאשׁר צוה יהוה כן עשׂו ויברך אתם משׁה׃
Shemot 40:1 וידבר יהוה אל־משׁה לאמר׃
Shemot 40:2 ביום־החדשׁ הראשׁון באחד לחדשׁ תקים את־משׁכן אהל מועד׃
Shemot 40:3 ושׂמת שׁם את ארון העדות וסכת על־הארן את־הפרכת׃
Shemot 40:4 והבאת את־השׁלחן וערכת את־ערכו והבאת את־המנרה והעלית את־נרתיה׃
Shemot 40:5 ונתתה את־מזבח הזהב לקטרת לפני ארון העדת ושׂמת את־מסך הפתח למשׁכן׃
Shemot 40:6 ונתתה את מזבח העלה לפני פתח משׁכן אהל־מועד׃
Shemot 40:7 ונתת את־הכיר בין־אהל מועד ובין המזבח ונתת שׁם מים׃
Shemot 40:8 ושׂמת את־החצר סביב ונתת את־מסך שׁער החצר׃
Shemot 40:9 ולקחת את־שׁמן המשׁחה ומשׁחת את־המשׁכן ואת־כל־אשׁר־בו וקדשׁת אתו ואת־כל־כליו והיה קדשׁ׃
Shemot 40:10 ומשׁחת את־מזבח העלה ואת־כל־כליו וקדשׁת את־המזבח והיה המזבח קדשׁ קדשׁים׃
Shemot 40:11 ומשׁחת את־הכיר ואת־כנו וקדשׁת אתו׃
Shemot 40:12 והקרבת את־אהרן ואת־בניו אל־פתח אהל מועד ורחצת אתם במים׃
Shemot 40:13 והלבשׁת את־אהרן את בגדי הקדשׁ ומשׁחת אתו וקדשׁת אתו וכהן לי׃
Shemot 40:14 ואת־בניו תקריב והלבשׁת אתם כתנת׃
Shemot 40:15 ומשׁחת אתם כאשׁר משׁחת את־אביהם וכהנו לי והיתה להית להם משׁחתם לכהנת עולם לדרתם׃
Shemot 40:16 ויעשׂ משׁה ככל אשׁר צוה יהוה אתו כן עשׂה׃
Shemot 40:17 ויהי בחדשׁ הראשׁון בשׁנה השׁנית באחד לחדשׁ הוקם המשׁכן׃
Shemot 40:18 ויקם משׁה את־המשׁכן ויתן את־אדניו וישׂם את־קרשׁיו ויתן את־בריחיו ויקם את־עמודיו׃
Shemot 40:19 ויפרשׂ את־האהל על־המשׁכן וישׂם את־מכסה האהל עליו מלמעלה כאשׁר צוה יהוה את־משׁה׃
Shemot 40:20 ויקח ויתן את־העדת אל־הארן וישׂם את־הבדים על־הארן ויתן את־הכפרת על־הארן מלמעלה׃
Shemot 40:21 ויבא את־הארן אל־המשׁכן וישׂם את פרכת המסך ויסך על ארון העדות כאשׁר צוה יהוה את־משׁה׃
Shemot 40:22 ויתן את־השׁלחן באהל מועד על ירך המשׁכן צפנה מחוץ לפרכת׃
Shemot 40:23 ויערך עליו ערך לחם לפני יהוה כאשׁר צוה יהוה את־משׁה׃
Shemot 40:24 וישׂם את־המנרה באהל מועד נכח השׁלחן על ירך המשׁכן נגבה׃
Shemot 40:25 ויעל הנרת לפני יהוה כאשׁר צוה יהוה את־משׁה׃
Shemot 40:26 וישׂם את־מזבח הזהב באהל מועד לפני הפרכת׃
Shemot 40:27 ויקטר עליו קטרת סמים כאשׁר צוה יהוה את־משׁה׃
Shemot 40:28 וישׂם את־מסך הפתח למשׁכן׃
Shemot 40:29 ואת מזבח העלה שׂם פתח משׁכן אהל־מועד ויעל עליו את־העלה ואת־המנחה כאשׁר צוה יהוה את־משׁה׃
Shemot 40:30 וישׂם את־הכיר בין־אהל מועד ובין המזבח ויתן שׁמה מים לרחצה׃
Shemot 40:31 ורחצו ממנו משׁה ואהרן ובניו את־ידיהם ואת־רגליהם׃
Shemot 40:32 בבאם אל־אהל מועד ובקרבתם אל־המזבח ירחצו כאשׁר צוה יהוה את־משׁה׃
Shemot 40:33 ויקם את־החצר סביב למשׁכן ולמזבח ויתן את־מסך שׁער החצר ויכל משׁה את־המלאכה׃
Shemot 40:34 ויכס הענן את־אהל מועד וכבוד יהוה מלא את־המשׁכן׃
Shemot 40:35 ולא־יכל משׁה לבוא אל־אהל מועד כי־שׁכן עליו הענן וכבוד יהוה מלא את־המשׁכן׃
Shemot 40:36 ובהעלות הענן מעל המשׁכן יסעו בני ישׂראל בכל מסעיהם׃
Shemot 40:37 ואם־לא יעלה הענן ולא יסעו עד־יום העלתו׃
Shemot 40:38 כי ענן יהוה על־המשׁכן יומם ואשׁ תהיה לילה בו לעיני כל־בית־ישׂראל בכל־מסעיהם׃