Yeshayahu 42:5 - 43:10
Yeshayahu 42:5 כה־אמר האל יהוה בורא השׁמים ונוטיהם רקע הארץ וצאצאיה נתן נשׁמה לעם עליה ורוח להלכים בה׃
Yeshayahu 42:6 אני יהוה קראתיך בצדק ואחזק בידך ואצרך ואתנך לברית עם לאור גוים׃
Yeshayahu 42:7 לפקח עינים עורות להוציא ממסגר אסיר מבית כלא ישׁבי חשׁך׃
Yeshayahu 42:8 אני יהוה הוא שׁמי וכבודי לאחר לא־אתן ותהלתי לפסילים׃
Yeshayahu 42:9 הראשׁנות הנה־באו וחדשׁות אני מגיד בטרם תצמחנה אשׁמיע אתכם׃
Yeshayahu 42:10 שׁירו ליהוה שׁיר חדשׁ תהלתו מקצה הארץ יורדי הים ומלאו איים וישׁביהם׃
Yeshayahu 42:11 ישׂאו מדבר ועריו חצרים תשׁב קדר ירנו ישׁבי סלע מראשׁ הרים יצוחו׃
Yeshayahu 42:12 ישׂימו ליהוה כבוד ותהלתו באיים יגידו׃
Yeshayahu 42:13 יהוה כגבור יצא כאישׁ מלחמות יעיר קנאה יריע אף־יצריח על־איביו יתגבר׃
Yeshayahu 42:14 החשׁיתי מעולם אחרישׁ אתאפק כיולדה אפעה אשׁם ואשׁאף יחד׃
Yeshayahu 42:15 אחריב הרים וגבעות וכל־עשׂבם אובישׁ ושׂמתי נהרות לאיים ואגמים אובישׁ׃
Yeshayahu 42:16 והולכתי עורים בדרך לא ידעו בנתיבות לא־ידעו אדריכם אשׂים מחשׁך לפניהם לאור ומעקשׁים למישׁור אלה הדברים עשׂיתם ולא עזבתים׃
Yeshayahu 42:17 נסגו אחור יבשׁו בשׁת הבטחים בפסל האמרים למסכה אתם אלהינו׃
Yeshayahu 42:18 החרשׁים שׁמעו והעורים הביטו לראות׃
Yeshayahu 42:19 מי עור כי אם־עבדי וחרשׁ כמלאכי אשׁלח מי עור כמשׁלם ועור כעבד יהוה׃
Yeshayahu 42:20 ראית רבות ולא תשׁמר פקוח אזנים ולא ישׁמע׃
Yeshayahu 42:21 יהוה חפץ למען צדקו יגדיל תורה ויאדיר׃
Yeshayahu 42:22 והוא עם־בזוז ושׁסוי הפח בחורים כלם ובבתי כלאים החבאו היו לבז ואין מציל משׁסה ואין־אמר השׁב׃
Yeshayahu 42:23 מי בכם יאזין זאת יקשׁב וישׁמע לאחור׃
Yeshayahu 42:24 מי־נתן למשׁוסה יעקב וישׂראל לבזזים הלוא יהוה זו חטאנו לו ולא־אבו בדרכיו הלוך ולא שׁמעו בתורתו׃
Yeshayahu 42:25 וישׁפך עליו חמה אפו ועזוז מלחמה ותלהטהו מסביב ולא ידע ותבער־בו ולא־ישׂים על־לב׃
Yeshayahu 43:1 ועתה כה־אמר יהוה בראך יעקב ויצרך ישׂראל אל־תירא כי גאלתיך קראתי בשׁמך לי־אתה׃
Yeshayahu 43:2 כי־תעבר במים אתך־אני ובנהרות לא ישׁטפוך כי־תלך במו־אשׁ לא תכוה ולהבה לא תבער־בך׃
Yeshayahu 43:3 כי אני יהוה אלהיך קדושׁ ישׂראל מושׁיעך נתתי כפרך מצרים כושׁ וסבא תחתיך׃
Yeshayahu 43:4 מאשׁר יקרת בעיני נכבדת ואני אהבתיך ואתן אדם תחתיך ולאמים תחת נפשׁך׃
Yeshayahu 43:5 אל־תירא כי אתך־אני ממזרח אביא זרעך וממערב אקבצך׃
Yeshayahu 43:6 אמר לצפון תני ולתימן אל־תכלאי הביאי בני מרחוק ובנותי מקצה הארץ׃
Yeshayahu 43:7 כל הנקרא בשׁמי ולכבודי בראתיו יצרתיו אף־עשׂיתיו׃
Yeshayahu 43:8 הוציא עם־עור ועינים ישׁ וחרשׁים ואזנים למו׃
Yeshayahu 43:9 כל־הגוים נקבצו יחדו ויאספו לאמים מי בהם יגיד זאת וראשׁנות ישׁמיענו יתנו עדיהם ויצדקו וישׁמעו ויאמרו אמת׃
Yeshayahu 43:10 אתם עדי נאם־יהוה ועבדי אשׁר בחרתי למען תדעו ותאמינו לי ותבינו כי־אני הוא לפני לא־נוצר אל ואחרי לא יהיה׃
