B'reisheet (parsha) (Hebrew)

B'reisheet 1:1 - 6:8

B’reisheet 1:1 בראשׁית ברא אלהים את השׁמים ואת הארץ׃
B’reisheet 1:2 והארץ היתה תהו ובהו וחשׁך על־פני תהום ורוח אלהים מרחפת על־פני המים׃
B’reisheet 1:3 ויאמר אלהים יהי אור ויהי־אור׃
B’reisheet 1:4 וירא אלהים את־האור כי־טוב ויבדל אלהים בין האור ובין החשׁך׃
B’reisheet 1:5 ויקרא אלהים לאור יום ולחשׁך קרא לילה ויהי־ערב ויהי־בקר יום אחד׃
B’reisheet 1:6 ויאמר אלהים יהי רקיע בתוך המים ויהי מבדיל בין מים למים׃
B’reisheet 1:7 ויעשׂ אלהים את־הרקיע ויבדל בין המים אשׁר מתחת לרקיע ובין המים אשׁר מעל לרקיע ויהי־כן׃
B’reisheet 1:8 ויקרא אלהים לרקיע שׁמים ויהי־ערב ויהי־בקר יום שׁני׃
B’reisheet 1:9 ויאמר אלהים יקוו המים מתחת השׁמים אל־מקום אחד ותראה היבשׁה ויהי־כן׃
B’reisheet 1:10 ויקרא אלהים ליבשׁה ארץ ולמקוה המים קרא ימים וירא אלהים כי־טוב׃
B’reisheet 1:11 ויאמר אלהים תדשׁא הארץ דשׁא עשׂב מזריע זרע עץ פרי עשׂה פרי למינו אשׁר זרעו־בו על־הארץ ויהי־כן׃
B’reisheet 1:12 ותוצא הארץ דשׁא עשׂב מזריע זרע למינהו ועץ עשׂה־פרי אשׁר זרעו־בו למינהו וירא אלהים כי־טוב׃
B’reisheet 1:13 ויהי־ערב ויהי־בקר יום שׁלישׁי׃
B’reisheet 1:14 ויאמר אלהים יהי מארת ברקיע השׁמים להבדיל בין היום ובין הלילה והיו לאתת ולמועדים ולימים ושׁנים׃
B’reisheet 1:15 והיו למאורת ברקיע השׁמים להאיר על־הארץ ויהי־כן׃
B’reisheet 1:16 ויעשׂ אלהים את־שׁני המארת הגדלים את־המאור הגדל לממשׁלת היום ואת־המאור הקטן לממשׁלת הלילה ואת הכוכבים׃
B’reisheet 1:17 ויתן אתם אלהים ברקיע השׁמים להאיר על־הארץ׃
B’reisheet 1:18 ולמשׁל ביום ובלילה ולהבדיל בין האור ובין החשׁך וירא אלהים כי־טוב׃
B’reisheet 1:19 ויהי־ערב ויהי־בקר יום רביעי׃
B’reisheet 1:20 ויאמר אלהים ישׁרצו המים שׁרץ נפשׁ חיה ועוף יעופף על־הארץ על־פני רקיע השׁמים׃
B’reisheet 1:21 ויברא אלהים את־התנינם הגדלים ואת כל־נפשׁ החיה הרמשׂת אשׁר שׁרצו המים למינהם ואת כל־עוף כנף למינהו וירא אלהים כי־טוב׃
B’reisheet 1:22 ויברך אתם אלהים לאמר פרו ורבו ומלאו את־המים בימים והעוף ירב בארץ׃
B’reisheet 1:23 ויהי־ערב ויהי־בקר יום חמישׁי׃
B’reisheet 1:24 ויאמר אלהים תוצא הארץ נפשׁ חיה למינה בהמה ורמשׂ וחיתו־ארץ למינה ויהי־כן׃
B’reisheet 1:25 ויעשׂ אלהים את־חית הארץ למינה ואת־הבהמה למינה ואת כל־רמשׂ האדמה למינהו וירא אלהים כי־טוב׃
B’reisheet 1:26 ויאמר אלהים נעשׂה אדם בצלמנו כדמותנו וירדו בדגת הים ובעוף השׁמים ובבהמה ובכל־הארץ ובכל־הרמשׂ הרמשׂ על־הארץ׃
B’reisheet 1:27 ויברא אלהים את־האדם בצלמו בצלם אלהים ברא אתו זכר ונקבה ברא אתם׃
B’reisheet 1:28 ויברך אתם אלהים ויאמר להם אלהים פרו ורבו ומלאו את־הארץ וכבשׁה ורדו בדגת הים ובעוף השׁמים ובכל־חיה הרמשׂת על־הארץ׃
B’reisheet 1:29 ויאמר אלהים הנה נתתי לכם את־כל־עשׂב זרע זרע אשׁר על־פני כל־הארץ ואת־כל־העץ אשׁר־בו פרי־עץ זרע זרע לכם יהיה לאכלה׃
B’reisheet 1:30 ולכל־חית הארץ ולכל־עוף השׁמים ולכל רומשׂ על־הארץ אשׁר־בו נפשׁ חיה את־כל־ירק עשׂב לאכלה ויהי־כן׃
B’reisheet 1:31 וירא אלהים את־כל־אשׁר עשׂה והנה־טוב מאד ויהי־ערב ויהי־בקר יום השׁשׁי׃
B’reisheet 2:1 ויכלו השׁמים והארץ וכל־צבאם׃
B’reisheet 2:2 ויכל אלהים ביום השׁביעי מלאכתו אשׁר עשׂה וישׁבת ביום השׁביעי מכל־מלאכתו אשׁר עשׂה׃
B’reisheet 2:3 ויברך אלהים את־יום השׁביעי ויקדשׁ אתו כי בו שׁבת מכל־מלאכתו אשׁר־ברא אלהים לעשׂות׃
B’reisheet 2:4 אלה תולדות השׁמים והארץ בהבראם ביום עשׂות יהוה אלהים ארץ ושׁמים׃
B’reisheet 2:5 וכל שׂיח השׂדה טרם יהיה בארץ וכל־עשׂב השׂדה טרם יצמח כי לא המטיר יהוה אלהים על־הארץ ואדם אין לעבד את־האדמה׃
B’reisheet 2:6 ואד יעלה מן־הארץ והשׁקה את־כל־פני־האדמה׃
B’reisheet 2:7 וייצר יהוה אלהים את־האדם עפר מן־האדמה ויפח באפיו נשׁמת חיים ויהי האדם לנפשׁ חיה׃
B’reisheet 2:8 ויטע יהוה אלהים גן־בעדן מקדם וישׂם שׁם את־האדם אשׁר יצר׃
B’reisheet 2:9 ויצמח יהוה אלהים מן־האדמה כל־עץ נחמד למראה וטוב למאכל ועץ החיים בתוך הגן ועץ הדעת טוב ורע׃
B’reisheet 2:10 ונהר יצא מעדן להשׁקות את־הגן ומשׁם יפרד והיה לארבעה ראשׁים׃
B’reisheet 2:11 שׁם האחד פישׁון הוא הסבב את כל־ארץ החוילה אשׁר־שׁם הזהב׃
B’reisheet 2:12 וזהב הארץ ההוא טוב שׁם הבדלח ואבן השׁהם׃
B’reisheet 2:13 ושׁם־הנהר השׁני גיחון הוא הסובב את כל־ארץ כושׁ׃
B’reisheet 2:14 ושׁם הנהר השׁלישׁי חדקל הוא ההלך קדמת אשׁור והנהר הרביעי הוא פרת׃
B’reisheet 2:15 ויקח יהוה אלהים את־האדם וינחהו בגן־עדן לעבדה ולשׁמרה׃
B’reisheet 2:16 ויצו יהוה אלהים על־האדם לאמר מכל עץ־הגן אכל תאכל׃
B’reisheet 2:17 ומעץ הדעת טוב ורע לא תאכל ממנו כי ביום אכלך ממנו מות תמות׃
B’reisheet 2:18 ויאמר יהוה אלהים לא־טוב היות האדם לבדו אעשׂה־לו עזר כנגדו׃
B’reisheet 2:19 ויצר יהוה אלהים מן־האדמה כל־חית השׂדה ואת כל־עוף השׁמים ויבא אל־האדם לראות מה־יקרא־לו וכל אשׁר יקרא־לו האדם נפשׁ חיה הוא שׁמו׃
B’reisheet 2:20 ויקרא האדם שׁמות לכל־הבהמה ולעוף השׁמים ולכל חית השׂדה ולאדם לא־מצא עזר כנגדו׃
B’reisheet 2:21 ויפל יהוה אלהים תרדמה על־האדם ויישׁן ויקח אחת מצלעתיו ויסגר בשׂר תחתנה׃
B’reisheet 2:22 ויבן יהוה אלהים את־הצלע אשׁר־לקח מן־האדם לאשׁה ויבאה אל־האדם׃
B’reisheet 2:23 ויאמר האדם זאת הפעם עצם מעצמי ובשׂר מבשׂרי לזאת יקרא אשׁה כי מאישׁ לקחה־זאת׃
B’reisheet 2:24 על־כן יעזב־אישׁ את־אביו ואת־אמו ודבק באשׁתו והיו לבשׂר אחד׃
B’reisheet 2:25 ויהיו שׁניהם ערומים האדם ואשׁתו ולא יתבשׁשׁו׃
B’reisheet 3:1 והנחשׁ היה ערום מכל חית השׂדה אשׁר עשׂה יהוה אלהים ויאמר אל־האשׁה אף כי־אמר אלהים לא תאכלו מכל עץ הגן׃
B’reisheet 3:2 ותאמר האשׁה אל־הנחשׁ מפרי עץ־הגן נאכל׃
B’reisheet 3:3 ומפרי העץ אשׁר בתוך־הגן אמר אלהים לא תאכלו ממנו ולא תגעו בו פן־תמתון׃
B’reisheet 3:4 ויאמר הנחשׁ אל־האשׁה לא־מות תמתון׃
B’reisheet 3:5 כי ידע אלהים כי ביום אכלכם ממנו ונפקחו עיניכם והייתם כאלהים ידעי טוב ורע׃
B’reisheet 3:6 ותרא האשׁה כי טוב העץ למאכל וכי תאוה־הוא לעינים ונחמד העץ להשׂכיל ותקח מפריו ותאכל ותתן גם־לאישׁה עמה ויאכל׃
B’reisheet 3:7 ותפקחנה עיני שׁניהם וידעו כי עירמם הם ויתפרו עלה תאנה ויעשׂו להם חגרת׃
B’reisheet 3:8 וישׁמעו את־קול יהוה אלהים מתהלך בגן לרוח היום ויתחבא האדם ואשׁתו מפני יהוה אלהים בתוך עץ הגן׃
B’reisheet 3:9 ויקרא יהוה אלהים אל־האדם ויאמר לו איכה׃
B’reisheet 3:10 ויאמר את־קלך שׁמעתי בגן ואירא כי־עירם אנכי ואחבא׃
B’reisheet 3:11 ויאמר מי הגיד לך כי עירם אתה המן־העץ אשׁר צויתיך לבלתי אכל־ממנו אכלת׃
B’reisheet 3:12 ויאמר האדם האשׁה אשׁר נתתה עמדי הוא נתנה־לי מן־העץ ואכל׃
B’reisheet 3:13 ויאמר יהוה אלהים לאשׁה מה־זאת עשׂית ותאמר האשׁה הנחשׁ השׁיאני ואכל׃
B’reisheet 3:14 ויאמר יהוה אלהים אל־הנחשׁ כי עשׂית זאת ארור אתה מכל־הבהמה ומכל חית השׂדה על־גחנך תלך ועפר תאכל כל־ימי חייך׃
B’reisheet 3:15 ואיבה אשׁית בינך ובין האשׁה ובין זרעך ובין זרעה הוא ישׁופך ראשׁ ואתה תשׁופנו עקב׃
B’reisheet 3:16 אל־האשׁה אמר הרבה ארבה עצבונך והרנך בעצב תלדי בנים ואל־אישׁך תשׁוקתך והוא ימשׁל־בך׃
B’reisheet 3:17 ולאדם אמר כי־שׁמעת לקול אשׁתך ותאכל מן־העץ אשׁר צויתיך לאמר לא תאכל ממנו ארורה האדמה בעבורך בעצבון תאכלנה כל ימי חייך׃
B’reisheet 3:18 וקוץ ודרדר תצמיח לך ואכלת את־עשׂב השׂדה׃
B’reisheet 3:19 בזעת אפיך תאכל לחם עד שׁובך אל־האדמה כי ממנה לקחת כי־עפר אתה ואל־עפר תשׁוב׃
B’reisheet 3:20 ויקרא האדם שׁם אשׁתו חוה כי הוא היתה אם כל־חי׃
B’reisheet 3:21 ויעשׂ יהוה אלהים לאדם ולאשׁתו כתנות עור וילבשׁם׃
B’reisheet 3:22 ויאמר יהוה אלהים הן האדם היה כאחד ממנו לדעת טוב ורע ועתה פן־ישׁלח ידו ולקח גם מעץ החיים ואכל וחי לעלם׃
B’reisheet 3:23 וישׁלחהו יהוה אלהים מגן־עדן לעבד את־האדמה אשׁר לקח משׁם׃
B’reisheet 3:24 ויגרשׁ את־האדם וישׁכן מקדם לגן־עדן את־הכרבים ואת להט החרב המתהפכת לשׁמר את־דרך עץ החיים׃
B’reisheet 4:1 והאדם ידע את־חוה אשׁתו ותהר ותלד את־קין ותאמר קניתי אישׁ את־יהוה׃
B’reisheet 4:2 ותסף ללדת את־אחיו את־הבל ויהי־הבל רעה צאן וקין היה עבד אדמה׃
B’reisheet 4:3 ויהי מקץ ימים ויבא קין מפרי האדמה מנחה ליהוה׃
B’reisheet 4:4 והבל הביא גם־הוא מבכרות צאנו ומחלבהן וישׁע יהוה אל־הבל ואל־מנחתו׃
B’reisheet 4:5 ואל־קין ואל־מנחתו לא שׁעה ויחר לקין מאד ויפלו פניו׃
B’reisheet 4:6 ויאמר יהוה אל־קין למה חרה לך ולמה נפלו פניך׃
B’reisheet 4:7 הלוא אם־תיטיב שׂאת ואם לא תיטיב לפתח חטאת רבץ ואליך תשׁוקתו ואתה תמשׁל־בו׃
B’reisheet 4:8 ויאמר קין אל־הבל אחיו ויהי בהיותם בשׂדה ויקם קין אל־הבל אחיו ויהרגהו׃
B’reisheet 4:9 ויאמר יהוה אל־קין אי הבל אחיך ויאמר לא ידעתי השׁמר אחי אנכי׃
B’reisheet 4:10 ויאמר מה עשׂית קול דמי אחיך צעקים אלי מן־האדמה׃
B’reisheet 4:11 ועתה ארור אתה מן־האדמה אשׁר פצתה את־פיה לקחת את־דמי אחיך מידך׃
B’reisheet 4:12 כי תעבד את־האדמה לא־תסף תת־כחה לך נע ונד תהיה בארץ׃
B’reisheet 4:13 ויאמר קין אל־יהוה גדול עוני מנשׂוא׃
B’reisheet 4:14 הן גרשׁת אתי היום מעל פני האדמה ומפניך אסתר והייתי נע ונד בארץ והיה כל־מצאי יהרגני׃
B’reisheet 4:15 ויאמר לו יהוה לכן כל־הרג קין שׁבעתים יקם וישׂם יהוה לקין אות לבלתי הכות־אתו כל־מצאו׃
B’reisheet 4:16 ויצא קין מלפני יהוה וישׁב בארץ־נוד קדמת־עדן׃
B’reisheet 4:17 וידע קין את־אשׁתו ותהר ותלד את־חנוך ויהי בנה עיר ויקרא שׁם העיר כשׁם בנו חנוך׃
B’reisheet 4:18 ויולד לחנוך את־עירד ועירד ילד את־מחויאל ומחייאל ילד את־מתושׁאל ומתושׁאל ילד את־למך׃
B’reisheet 4:19 ויקח־לו למך שׁתי נשׁים שׁם האחת עדה ושׁם השׁנית צלה׃
B’reisheet 4:20 ותלד עדה את־יבל הוא היה אבי ישׁב אהל ומקנה׃
B’reisheet 4:21 ושׁם אחיו יובל הוא היה אבי כל־תפשׂ כנור ועוגב׃
B’reisheet 4:22 וצלה גם־הוא ילדה את־תובל קין לטשׁ כל־חרשׁ נחשׁת וברזל ואחות תובל־קין נעמה׃
B’reisheet 4:23 ויאמר למך לנשׁיו עדה וצלה שׁמען קולי נשׁי למך האזנה אמרתי כי אישׁ הרגתי לפצעי וילד לחברתי׃
B’reisheet 4:24 כי שׁבעתים יקם־קין ולמך שׁבעים ושׁבעה׃
B’reisheet 4:25 וידע אדם עוד את־אשׁתו ותלד בן ותקרא את־שׁמו שׁת כי שׁת־לי אלהים זרע אחר תחת הבל כי הרגו קין׃
B’reisheet 4:26 ולשׁת גם־הוא ילד־בן ויקרא את־שׁמו אנושׁ אז הוחל לקרא בשׁם יהוה׃
B’reisheet 5:1 זה ספר תולדת אדם ביום ברא אלהים אדם בדמות אלהים עשׂה אתו׃
B’reisheet 5:2 זכר ונקבה בראם ויברך אתם ויקרא את־שׁמם אדם ביום הבראם׃
B’reisheet 5:3 ויחי אדם שׁלשׁים ומאת שׁנה ויולד בדמותו כצלמו ויקרא את־שׁמו שׁת׃
B’reisheet 5:4 ויהיו ימי־אדם אחרי הולידו את־שׁת שׁמנה מאת שׁנה ויולד בנים ובנות׃
B’reisheet 5:5 ויהיו כל־ימי אדם אשׁר־חי תשׁע מאות שׁנה ושׁלשׁים שׁנה וימת׃
B’reisheet 5:6 ויחי־שׁת חמשׁ שׁנים ומאת שׁנה ויולד את־אנושׁ׃
B’reisheet 5:7 ויחי־שׁת אחרי הולידו את־אנושׁ שׁבע שׁנים ושׁמנה מאות שׁנה ויולד בנים ובנות׃
B’reisheet 5:8 ויהיו כל־ימי־שׁת שׁתים עשׂרה שׁנה ותשׁע מאות שׁנה וימת׃
B’reisheet 5:9 ויחי אנושׁ תשׁעים שׁנה ויולד את־קינן׃
B’reisheet 5:10 ויחי אנושׁ אחרי הולידו את־קינן חמשׁ עשׂרה שׁנה ושׁמנה מאות שׁנה ויולד בנים ובנות׃
B’reisheet 5:11 ויהיו כל־ימי אנושׁ חמשׁ שׁנים ותשׁע מאות שׁנה וימת׃
B’reisheet 5:12 ויחי קינן שׁבעים שׁנה ויולד את־מהללאל׃
B’reisheet 5:13 ויחי קינן אחרי הולידו את־מהללאל ארבעים שׁנה ושׁמנה מאות שׁנה ויולד בנים ובנות׃
B’reisheet 5:14 ויהיו כל־ימי קינן עשׂר שׁנים ותשׁע מאות שׁנה וימת׃
B’reisheet 5:15 ויחי מהללאל חמשׁ שׁנים ושׁשׁים שׁנה ויולד את־ירד׃
B’reisheet 5:16 ויחי מהללאל אחרי הולידו את־ירד שׁלשׁים שׁנה ושׁמנה מאות שׁנה ויולד בנים ובנות׃
B’reisheet 5:17 ויהיו כל־ימי מהללאל חמשׁ ותשׁעים שׁנה ושׁמנה מאות שׁנה וימת׃
B’reisheet 5:18 ויחי־ירד שׁתים ושׁשׁים שׁנה ומאת שׁנה ויולד את־חנוך׃
B’reisheet 5:19 ויחי־ירד אחרי הולידו את־חנוך שׁמנה מאות שׁנה ויולד בנים ובנות׃
B’reisheet 5:20 ויהיו כל־ימי־ירד שׁתים ושׁשׁים שׁנה ותשׁע מאות שׁנה וימת׃
B’reisheet 5:21 ויחי חנוך חמשׁ ושׁשׁים שׁנה ויולד את־מתושׁלח׃
B’reisheet 5:22 ויתהלך חנוך את־האלהים אחרי הולידו את־מתושׁלח שׁלשׁ מאות שׁנה ויולד בנים ובנות׃
B’reisheet 5:23 ויהי כל־ימי חנוך חמשׁ ושׁשׁים שׁנה ושׁלשׁ מאות שׁנה׃
B’reisheet 5:24 ויתהלך חנוך את־האלהים ואיננו כי־לקח אתו אלהים׃
B’reisheet 5:25 ויחי מתושׁלח שׁבע ושׁמנים שׁנה ומאת שׁנה ויולד את־למך׃
B’reisheet 5:26 ויחי מתושׁלח אחרי הולידו את־למך שׁתים ושׁמונים שׁנה ושׁבע מאות שׁנה ויולד בנים ובנות׃
B’reisheet 5:27 ויהיו כל־ימי מתושׁלח תשׁע ושׁשׁים שׁנה ותשׁע מאות שׁנה וימת׃
B’reisheet 5:28 ויחי־למך שׁתים ושׁמנים שׁנה ומאת שׁנה ויולד בן׃
B’reisheet 5:29 ויקרא את־שׁמו נח לאמר זה ינחמנו ממעשׂנו ומעצבון ידינו מן־האדמה אשׁר אררה יהוה׃
B’reisheet 5:30 ויחי־למך אחרי הולידו את־נח חמשׁ ותשׁעים שׁנה וחמשׁ מאת שׁנה ויולד בנים ובנות׃
B’reisheet 5:31 ויהי כל־ימי־למך שׁבע ושׁבעים שׁנה ושׁבע מאות שׁנה וימת׃
B’reisheet 5:32 ויהי־נח בן־חמשׁ מאות שׁנה ויולד נח את־שׁם את־חם ואת־יפת׃
B’reisheet 6:1 ויהי כי־החל האדם לרב על־פני האדמה ובנות ילדו להם׃
B’reisheet 6:2 ויראו בני־האלהים את־בנות האדם כי טבת הנה ויקחו להם נשׁים מכל אשׁר בחרו׃
B’reisheet 6:3 ויאמר יהוה לא־ידון רוחי באדם לעלם בשׁגם הוא בשׂר והיו ימיו מאה ועשׂרים שׁנה׃
B’reisheet 6:4 הנפלים היו בארץ בימים ההם וגם אחרי־כן אשׁר יבאו בני האלהים אל־בנות האדם וילדו להם המה הגברים אשׁר מעולם אנשׁי השׁם׃
B’reisheet 6:5 וירא יהוה כי רבה רעת האדם בארץ וכל־יצר מחשׁבת לבו רק רע כל־היום׃
B’reisheet 6:6 וינחם יהוה כי־עשׂה את־האדם בארץ ויתעצב אל־לבו׃
B’reisheet 6:7 ויאמר יהוה אמחה את־האדם אשׁר־בראתי מעל פני האדמה מאדם עד־בהמה עד־רמשׂ ועד־עוף השׁמים כי נחמתי כי עשׂיתם׃
B’reisheet 6:8 ונח מצא חן בעיני יהוה׃