B’reisheet 6:9 אלה תולדת נח נח אישׁ צדיק תמים היה בדרתיו את־האלהים התהלך־נח׃
B’reisheet 6:10 ויולד נח שׁלשׁה בנים את־שׁם את־חם ואת־יפת׃
B’reisheet 6:11 ותשׁחת הארץ לפני האלהים ותמלא הארץ חמס׃
B’reisheet 6:12 וירא אלהים את־הארץ והנה נשׁחתה כי־השׁחית כל־בשׂר את־דרכו על־הארץ׃
B’reisheet 6:13 ויאמר אלהים לנח קץ כל־בשׂר בא לפני כי־מלאה הארץ חמס מפניהם והנני משׁחיתם את־הארץ׃
B’reisheet 6:14 עשׂה לך תבת עצי־גפר קנים תעשׂה את־התבה וכפרת אתה מבית ומחוץ בכפר׃
B’reisheet 6:15 וזה אשׁר תעשׂה אתה שׁלשׁ מאות אמה ארך התבה חמשׁים אמה רחבה ושׁלשׁים אמה קומתה׃
B’reisheet 6:16 צהר תעשׂה לתבה ואל־אמה תכלנה מלמעלה ופתח התבה בצדה תשׂים תחתים שׁנים ושׁלשׁים תעשׂה׃
B’reisheet 6:17 ואני הנני מביא את־המבול מים על־הארץ לשׁחת כל־בשׂר אשׁר־בו רוח חיים מתחת השׁמים כל אשׁר־בארץ יגוע׃
B’reisheet 6:18 והקמתי את־בריתי אתך ובאת אל־התבה אתה ובניך ואשׁתך ונשׁי־בניך אתך׃
B’reisheet 6:19 ומכל־החי מכל־בשׂר שׁנים מכל תביא אל־התבה להחית אתך זכר ונקבה יהיו׃
B’reisheet 6:20 מהעוף למינהו ומן־הבהמה למינה מכל רמשׂ האדמה למינהו שׁנים מכל יבאו אליך להחיות׃
B’reisheet 6:21 ואתה קח־לך מכל־מאכל אשׁר יאכל ואספת אליך והיה לך ולהם לאכלה׃
B’reisheet 6:22 ויעשׂ נח ככל אשׁר צוה אתו אלהים כן עשׂה׃
B’reisheet 7:1 ויאמר יהוה לנח בא־אתה וכל־ביתך אל־התבה כי־אתך ראיתי צדיק לפני בדור הזה׃
B’reisheet 7:2 מכל הבהמה הטהורה תקח־לך שׁבעה שׁבעה אישׁ ואשׁתו ומן־הבהמה אשׁר לא טהרה הוא שׁנים אישׁ ואשׁתו׃
B’reisheet 7:3 גם מעוף השׁמים שׁבעה שׁבעה זכר ונקבה לחיות זרע על־פני כל־הארץ׃
B’reisheet 7:4 כי לימים עוד שׁבעה אנכי ממטיר על־הארץ ארבעים יום וארבעים לילה ומחיתי את־כל־היקום אשׁר עשׂיתי מעל פני האדמה׃
B’reisheet 7:5 ויעשׂ נח ככל אשׁר־צוהו יהוה׃
B’reisheet 7:6 ונח בן־שׁשׁ מאות שׁנה והמבול היה מים על־הארץ׃
B’reisheet 7:7 ויבא נח ובניו ואשׁתו ונשׁי־בניו אתו אל־התבה מפני מי המבול׃
B’reisheet 7:8 מן־הבהמה הטהורה ומן־הבהמה אשׁר איננה טהרה ומן־העוף וכל אשׁר־רמשׂ על־האדמה׃
B’reisheet 7:9 שׁנים שׁנים באו אל־נח אל־התבה זכר ונקבה כאשׁר צוה אלהים את־נח׃
B’reisheet 7:10 ויהי לשׁבעת הימים ומי המבול היו על־הארץ׃
B’reisheet 7:11 בשׁנת שׁשׁ־מאות שׁנה לחיי־נח בחדשׁ השׁני בשׁבעה־עשׂר יום לחדשׁ ביום הזה נבקעו כל־מעינות תהום רבה וארבת השׁמים נפתחו׃
B’reisheet 7:12 ויהי הגשׁם על־הארץ ארבעים יום וארבעים לילה׃
B’reisheet 7:13 בעצם היום הזה בא נח ושׁם־וחם ויפת בני־נח ואשׁת נח ושׁלשׁת נשׁי־בניו אתם אל־התבה׃
B’reisheet 7:14 המה וכל־החיה למינה וכל־הבהמה למינה וכל־הרמשׂ הרמשׂ על־הארץ למינהו וכל־העוף למינהו כל צפור כל־כנף׃
B’reisheet 7:15 ויבאו אל־נח אל־התבה שׁנים שׁנים מכל־הבשׂר אשׁר־בו רוח חיים׃
B’reisheet 7:16 והבאים זכר ונקבה מכל־בשׂר באו כאשׁר צוה אתו אלהים ויסגר יהוה בעדו׃
B’reisheet 7:17 ויהי המבול ארבעים יום על־הארץ וירבו המים וישׂאו את־התבה ותרם מעל הארץ׃
B’reisheet 7:18 ויגברו המים וירבו מאד על־הארץ ותלך התבה על־פני המים׃
B’reisheet 7:19 והמים גברו מאד מאד על־הארץ ויכסו כל־ההרים הגבהים אשׁר־תחת כל־השׁמים׃
B’reisheet 7:20 חמשׁ עשׂרה אמה מלמעלה גברו המים ויכסו ההרים׃
B’reisheet 7:21 ויגוע כל־בשׂר הרמשׂ על־הארץ בעוף ובבהמה ובחיה ובכל־השׁרץ השׁרץ על־הארץ וכל האדם׃
B’reisheet 7:22 כל אשׁר נשׁמת־רוח חיים באפיו מכל אשׁר בחרבה מתו׃
B’reisheet 7:23 וימח את־כל־היקום אשׁר על־פני האדמה מאדם עד־בהמה עד־רמשׂ ועד־עוף השׁמים וימחו מן־הארץ וישׁאר אך־נח ואשׁר אתו בתבה׃
B’reisheet 7:24 ויגברו המים על־הארץ חמשׁים ומאת יום׃
B’reisheet 8:1 ויזכר אלהים את־נח ואת כל־החיה ואת־כל־הבהמה אשׁר אתו בתבה ויעבר אלהים רוח על־הארץ וישׁכו המים׃
B’reisheet 8:2 ויסכרו מעינת תהום וארבת השׁמים ויכלא הגשׁם מן־השׁמים׃
B’reisheet 8:3 וישׁבו המים מעל הארץ הלוך ושׁוב ויחסרו המים מקצה חמשׁים ומאת יום׃
B’reisheet 8:4 ותנח התבה בחדשׁ השׁביעי בשׁבעה־עשׂר יום לחדשׁ על הרי אררט׃
B’reisheet 8:5 והמים היו הלוך וחסור עד החדשׁ העשׂירי בעשׂירי באחד לחדשׁ נראו ראשׁי ההרים׃
B’reisheet 8:6 ויהי מקץ ארבעים יום ויפתח נח את־חלון התבה אשׁר עשׂה׃
B’reisheet 8:7 וישׁלח את־הערב ויצא יצוא ושׁוב עד־יבשׁת המים מעל הארץ׃
B’reisheet 8:8 וישׁלח את־היונה מאתו לראות הקלו המים מעל פני האדמה׃
B’reisheet 8:9 ולא־מצאה היונה מנוח לכף־רגלה ותשׁב אליו אל־התבה כי־מים על־פני כל־הארץ וישׁלח ידו ויקחה ויבא אתה אליו אל־התבה׃
B’reisheet 8:10 ויחל עוד שׁבעת ימים אחרים ויסף שׁלח את־היונה מן־התבה׃
B’reisheet 8:11 ותבא אליו היונה לעת ערב והנה עלה־זית טרף בפיה וידע נח כי־קלו המים מעל הארץ׃
B’reisheet 8:12 וייחל עוד שׁבעת ימים אחרים וישׁלח את־היונה ולא־יספה שׁוב־אליו עוד׃
B’reisheet 8:13 ויהי באחת ושׁשׁ־מאות שׁנה בראשׁון באחד לחדשׁ חרבו המים מעל הארץ ויסר נח את־מכסה התבה וירא והנה חרבו פני האדמה׃
B’reisheet 8:14 ובחדשׁ השׁני בשׁבעה ועשׂרים יום לחדשׁ יבשׁה הארץ׃
B’reisheet 8:15 וידבר אלהים אל־נח לאמר׃
B’reisheet 8:16 צא מן־התבה אתה ואשׁתך ובניך ונשׁי־בניך אתך׃
B’reisheet 8:17 כל־החיה אשׁר־אתך מכל־בשׂר בעוף ובבהמה ובכל־הרמשׂ הרמשׂ על־הארץ הוצא אתך ושׁרצו בארץ ופרו ורבו על־הארץ׃
B’reisheet 8:18 ויצא־נח ובניו ואשׁתו ונשׁי־בניו אתו׃
B’reisheet 8:19 כל־החיה כל־הרמשׂ וכל־העוף כל רומשׂ על־הארץ למשׁפחתיהם יצאו מן־התבה׃
B’reisheet 8:20 ויבן נח מזבח ליהוה ויקח מכל הבהמה הטהרה ומכל העוף הטהור ויעל עלת במזבח׃
B’reisheet 8:21 וירח יהוה את־ריח הניחח ויאמר יהוה אל־לבו לא־אסף לקלל עוד את־האדמה בעבור האדם כי יצר לב האדם רע מנעריו ולא־אסף עוד להכות את־כל־חי כאשׁר עשׂיתי׃
B’reisheet 8:22 עד כל־ימי הארץ זרע וקציר וקר וחם וקיץ וחרף ויום ולילה לא ישׁבתו׃
B’reisheet 9:1 ויברך אלהים את־נח ואת־בניו ויאמר להם פרו ורבו ומלאו את־הארץ׃
B’reisheet 9:2 ומוראכם וחתכם יהיה על כל־חית הארץ ועל כל־עוף השׁמים בכל אשׁר תרמשׂ האדמה ובכל־דגי הים בידכם נתנו׃
B’reisheet 9:3 כל־רמשׂ אשׁר הוא־חי לכם יהיה לאכלה כירק עשׂב נתתי לכם את־כל׃
B’reisheet 9:4 אך־בשׂר בנפשׁו דמו לא תאכלו׃
B’reisheet 9:5 ואך את־דמכם לנפשׁתיכם אדרשׁ מיד כל־חיה אדרשׁנו ומיד האדם מיד אישׁ אחיו אדרשׁ את־נפשׁ האדם׃
B’reisheet 9:6 שׁפך דם האדם באדם דמו ישׁפך כי בצלם אלהים עשׂה את־האדם׃
B’reisheet 9:7 ואתם פרו ורבו שׁרצו בארץ ורבו־בה׃
B’reisheet 9:8 ויאמר אלהים אל־נח ואל־בניו אתו לאמר׃
B’reisheet 9:9 ואני הנני מקים את־בריתי אתכם ואת־זרעכם אחריכם׃
B’reisheet 9:10 ואת כל־נפשׁ החיה אשׁר אתכם בעוף בבהמה ובכל־חית הארץ אתכם מכל יצאי התבה לכל חית הארץ׃
B’reisheet 9:11 והקמתי את־בריתי אתכם ולא־יכרת כל־בשׂר עוד ממי המבול ולא־יהיה עוד מבול לשׁחת הארץ׃
B’reisheet 9:12 ויאמר אלהים זאת אות־הברית אשׁר־אני נתן ביני וביניכם ובין כל־נפשׁ חיה אשׁר אתכם לדרת עולם׃
B’reisheet 9:13 את־קשׁתי נתתי בענן והיתה לאות ברית ביני ובין הארץ׃
B’reisheet 9:14 והיה בענני ענן על־הארץ ונראתה הקשׁת בענן׃
B’reisheet 9:15 וזכרתי את־בריתי אשׁר ביני וביניכם ובין כל־נפשׁ חיה בכל־בשׂר ולא־יהיה עוד המים למבול לשׁחת כל־בשׂר׃
B’reisheet 9:16 והיתה הקשׁת בענן וראיתיה לזכר ברית עולם בין אלהים ובין כל־נפשׁ חיה בכל־בשׂר אשׁר על־הארץ׃
B’reisheet 9:17 ויאמר אלהים אל־נח זאת אות־הברית אשׁר הקמתי ביני ובין כל־בשׂר אשׁר על־הארץ׃
B’reisheet 9:18 ויהיו בני־נח היצאים מן־התבה שׁם וחם ויפת וחם הוא אבי כנען׃
B’reisheet 9:19 שׁלשׁה אלה בני־נח ומאלה נפצה כל־הארץ׃
B’reisheet 9:20 ויחל נח אישׁ האדמה ויטע כרם׃
B’reisheet 9:21 וישׁת מן־היין וישׁכר ויתגל בתוך אהלה׃
B’reisheet 9:22 וירא חם אבי כנען את ערות אביו ויגד לשׁני־אחיו בחוץ׃
B’reisheet 9:23 ויקח שׁם ויפת את־השׂמלה וישׂימו על־שׁכם שׁניהם וילכו אחרנית ויכסו את ערות אביהם ופניהם אחרנית וערות אביהם לא ראו׃
B’reisheet 9:24 וייקץ נח מיינו וידע את אשׁר־עשׂה־לו בנו הקטן׃
B’reisheet 9:25 ויאמר ארור כנען עבד עבדים יהיה לאחיו׃
B’reisheet 9:26 ויאמר ברוך יהוה אלהי שׁם ויהי כנען עבד למו׃
B’reisheet 9:27 יפת אלהים ליפת וישׁכן באהלי־שׁם ויהי כנען עבד למו׃
B’reisheet 9:28 ויחי־נח אחר המבול שׁלשׁ מאות שׁנה וחמשׁים שׁנה׃
B’reisheet 9:29 ויהי כל־ימי־נח תשׁע מאות שׁנה וחמשׁים שׁנה וימת׃
B’reisheet 10:1 ואלה תולדת בני־נח שׁם חם ויפת ויולדו להם בנים אחר המבול׃
B’reisheet 10:2 בני יפת גמר ומגוג ומדי ויון ותבל ומשׁך ותירס׃
B’reisheet 10:3 ובני גמר אשׁכנז וריפת ותגרמה׃
B’reisheet 10:4 ובני יון אלישׁה ותרשׁישׁ כתים ודדנים׃
B’reisheet 10:5 מאלה נפרדו איי הגוים בארצתם אישׁ ללשׁנו למשׁפחתם בגויהם׃
B’reisheet 10:6 ובני חם כושׁ ומצרים ופוט וכנען׃
B’reisheet 10:7 ובני כושׁ סבא וחוילה וסבתה ורעמה וסבתכא ובני רעמה שׁבא ודדן׃
B’reisheet 10:8 וכושׁ ילד את־נמרד הוא החל להיות גבר בארץ׃
B’reisheet 10:9 הוא־היה גבר־ציד לפני יהוה על־כן יאמר כנמרד גבור ציד לפני יהוה׃
B’reisheet 10:10 ותהי ראשׁית ממלכתו בבל וארך ואכד וכלנה בארץ שׁנער׃
B’reisheet 10:11 מן־הארץ ההוא יצא אשׁור ויבן את־נינוה ואת־רחבת עיר ואת־כלח׃
B’reisheet 10:12 ואת־רסן בין נינוה ובין כלח הוא העיר הגדלה׃
B’reisheet 10:13 ומצרים ילד את־לודים ואת־ענמים ואת־להבים ואת־נפתחים׃
B’reisheet 10:14 ואת־פתרסים ואת־כסלחים אשׁר יצאו משׁם פלשׁתים ואת־כפתרים׃
B’reisheet 10:15 וכנען ילד את־צידן בכרו ואת־חת׃
B’reisheet 10:16 ואת־היבוסי ואת־האמרי ואת הגרגשׁי׃
B’reisheet 10:17 ואת־החוי ואת־הערקי ואת־הסיני׃
B’reisheet 10:18 ואת־הארודי ואת־הצמרי ואת־החמתי ואחר נפצו משׁפחות הכנעני׃
B’reisheet 10:19 ויהי גבול הכנעני מצידן באכה גררה עד־עזה באכה סדמה ועמרה ואדמה וצבים עד־לשׁע׃
B’reisheet 10:20 אלה בני־חם למשׁפחתם ללשׁנתם בארצתם בגויהם׃
B’reisheet 10:21 ולשׁם ילד גם־הוא אבי כל־בני־עבר אחי יפת הגדול׃
B’reisheet 10:22 בני שׁם עילם ואשׁור וארפכשׁד ולוד וארם׃
B’reisheet 10:23 ובני ארם עוץ וחול וגתר ומשׁ׃
B’reisheet 10:24 וארפכשׁד ילד את־שׁלח ושׁלח ילד את־עבר׃
B’reisheet 10:25 ולעבר ילד שׁני בנים שׁם האחד פלג כי בימיו נפלגה הארץ ושׁם אחיו יקטן׃
B’reisheet 10:26 ויקטן ילד את־אלמודד ואת־שׁלף ואת־חצרמות ואת־ירח׃
B’reisheet 10:27 ואת־הדורם ואת־אוזל ואת־דקלה׃
B’reisheet 10:28 ואת־עובל ואת־אבימאל ואת־שׁבא׃
B’reisheet 10:29 ואת־אופר ואת־חוילה ואת־יובב כל־אלה בני יקטן׃
B’reisheet 10:30 ויהי מושׁבם ממשׁא באכה ספרה הר הקדם׃
B’reisheet 10:31 אלה בני־שׁם למשׁפחתם ללשׁנתם בארצתם לגויהם׃
B’reisheet 10:32 אלה משׁפחת בני־נח לתולדתם בגויהם ומאלה נפרדו הגוים בארץ אחר המבול׃
B’reisheet 11:1 ויהי כל־הארץ שׂפה אחת ודברים אחדים׃
B’reisheet 11:2 ויהי בנסעם מקדם וימצאו בקעה בארץ שׁנער וישׁבו שׁם׃
B’reisheet 11:3 ויאמרו אישׁ אל־רעהו הבה נלבנה לבנים ונשׂרפה לשׂרפה ותהי להם הלבנה לאבן והחמר היה להם לחמר׃
B’reisheet 11:4 ויאמרו הבה נבנה־לנו עיר ומגדל וראשׁו בשׁמים ונעשׂה־לנו שׁם פן־נפוץ על־פני כל־הארץ׃
B’reisheet 11:5 וירד יהוה לראת את־העיר ואת־המגדל אשׁר בנו בני האדם׃
B’reisheet 11:6 ויאמר יהוה הן עם אחד ושׂפה אחת לכלם וזה החלם לעשׂות ועתה לא־יבצר מהם כל אשׁר יזמו לעשׂות׃
B’reisheet 11:7 הבה נרדה ונבלה שׁם שׂפתם אשׁר לא ישׁמעו אישׁ שׂפת רעהו׃
B’reisheet 11:8 ויפץ יהוה אתם משׁם על־פני כל־הארץ ויחדלו לבנת העיר׃
B’reisheet 11:9 על־כן קרא שׁמה בבל כי־שׁם בלל יהוה שׂפת כל־הארץ ומשׁם הפיצם יהוה על־פני כל־הארץ׃
B’reisheet 11:10 אלה תולדת שׁם שׁם בן־מאת שׁנה ויולד את־ארפכשׁד שׁנתים אחר המבול׃
B’reisheet 11:11 ויחי־שׁם אחרי הולידו את־ארפכשׁד חמשׁ מאות שׁנה ויולד בנים ובנות׃
B’reisheet 11:12 וארפכשׁד חי חמשׁ ושׁלשׁים שׁנה ויולד את־שׁלח׃
B’reisheet 11:13 ויחי ארפכשׁד אחרי הולידו את־שׁלח שׁלשׁ שׁנים וארבע מאות שׁנה ויולד בנים ובנות׃
B’reisheet 11:14 ושׁלח חי שׁלשׁים שׁנה ויולד את־עבר׃
B’reisheet 11:15 ויחי־שׁלח אחרי הולידו את־עבר שׁלשׁ שׁנים וארבע מאות שׁנה ויולד בנים ובנות׃
B’reisheet 11:16 ויחי־עבר ארבע ושׁלשׁים שׁנה ויולד את־פלג׃
B’reisheet 11:17 ויחי־עבר אחרי הולידו את־פלג שׁלשׁים שׁנה וארבע מאות שׁנה ויולד בנים ובנות׃
B’reisheet 11:18 ויחי־פלג שׁלשׁים שׁנה ויולד את־רעו׃
B’reisheet 11:19 ויחי־פלג אחרי הולידו את־רעו תשׁע שׁנים ומאתים שׁנה ויולד בנים ובנות׃
B’reisheet 11:20 ויחי רעו שׁתים ושׁלשׁים שׁנה ויולד את־שׂרוג׃
B’reisheet 11:21 ויחי רעו אחרי הולידו את־שׂרוג שׁבע שׁנים ומאתים שׁנה ויולד בנים ובנות׃
B’reisheet 11:22 ויחי שׂרוג שׁלשׁים שׁנה ויולד את־נחור׃
B’reisheet 11:23 ויחי שׂרוג אחרי הולידו את־נחור מאתים שׁנה ויולד בנים ובנות׃
B’reisheet 11:24 ויחי נחור תשׁע ועשׂרים שׁנה ויולד את־תרח׃
B’reisheet 11:25 ויחי נחור אחרי הולידו את־תרח תשׁע־עשׂרה שׁנה ומאת שׁנה ויולד בנים ובנות׃
B’reisheet 11:26 ויחי־תרח שׁבעים שׁנה ויולד את־אברם את־נחור ואת־הרן׃
B’reisheet 11:27 ואלה תולדת תרח תרח הוליד את־אברם את־נחור ואת־הרן והרן הוליד את־לוט׃
B’reisheet 11:28 וימת הרן על־פני תרח אביו בארץ מולדתו באור כשׂדים׃
B’reisheet 11:29 ויקח אברם ונחור להם נשׁים שׁם אשׁת־אברם שׂרי ושׁם אשׁת־נחור מלכה בת־הרן אבי־מלכה ואבי יסכה׃
B’reisheet 11:30 ותהי שׂרי עקרה אין לה ולד׃
B’reisheet 11:31 ויקח תרח את־אברם בנו ואת־לוט בן־הרן בן־בנו ואת שׂרי כלתו אשׁת אברם בנו ויצאו אתם מאור כשׂדים ללכת ארצה כנען ויבאו עד־חרן וישׁבו שׁם׃
B’reisheet 11:32 ויהיו ימי־תרח חמשׁ שׁנים ומאתים שׁנה וימת תרח בחרן׃
